حين يتعرض شخص ما للابتزاز فغالبًا ما تكون النصيحة الأولى لهذا الشخص هى ألا يجعل المبتز يشعر أن هناك ما يخفيه، وهى القاعدة التى تنطبق كذلك على التنمر، فبمجرد أن يشعر المتنمر أن ما يعتبره نقطة ضعفك هو أمر تفخر به ولا تحاول إخفاءه أو تشعر بالوصم منه غالبًا فإنك بذلك تجرده من كل أسلحته، هذه القاعدة التى تعلمتها “آية هانى” لكن بالطريقة الصعبة، بعد تعرضها للكثير من المضايقات خلال رحلتها فى التعليم بسبب استخدامها طرفا صناعيا، لكن بدلاً من أن ينال التنمر من عزيمتها ويجعلها تتهرب من الذهاب إلى المدرسة، اختارت أن تواجهه بشجاعة وتفخر بطرفها الصناعي.
ولدت “آية” بمشاكل كثيرة في قدمها ومنها عدم وجود مفصل في الركبة، واقترح الأطباء على عائلتها خيارين وهما جلوسها على كرسي متحرك إلى الأبد أو بتر القدم، ولكن العائلة اختارت البتر وهي في سن الثلاث سنوات، وقالت آية “لليوم السابع”: وجود الطرف الصناعي من أكثر الأشياء التي أعتبرها نعمة من الله لأنه اختارني على أن أكون قادرة على تحمل ذلك.
وأضافت آية: “من يوم ما بدأت أمشي بالطرف الصناعي وبحاول أخبيه، والدتي كانت بتحط إسفنج حوالين الطرف الصناعي عشان يبقى شبه الرجل الطبيعية ومحدش ياخد باله، ولكن جيت في يوم وقصيته بالمقص وشيلته، والإسفنج اتشال واتشال معاه الخوف”.
آية هاني
وتابعت آية: “كان نفسي دايمًا أخلي كل الناس اللي لابسة أطراف صناعية راضية ومبسوطة لكن اكتشفت إن المشكلة مش فينا المشكلة فى الناس اللى بيقابلونا”.
وعن التنمر قالت آية: “من خمس سنين كنت ماشية فى المدرسة فجأة مدرسة وقفتنى وبدأت تزعق على طريقة مشيتى، الفعل ده كان صدمة كبيرة بالنسبة ليا لأن التنمر من شخص بالغ وعاقل هيخلى الأطفال يتعلموا التنمر”.
آية تتحدى التنمر
استطردت آية: “وأنا صغيرة كانوا مش بيقبلوني وبيرفضوني في المدرسة عشان ما يتحملوش المسئولية ولما اتقبلت كانت في مشكلة إن الفصل كان عالي ومكنتش بقدر أطلع وكانوا بيفضلوا يحسسوني بالعجز، والبنات اللي كانوا معايا كانوا بيزقوني في رجلي ويخبطوا فيها والمدرسين مش بيعملوا حاجة كانوا بيقولوا دول أطفال وبعدين إنتي رجلك هتفضل مكسورة لغاية إمتى محدش كان بيصدق إني لابسة طرف صناعي لغاية لما بوريهولهم حتي عائلاتهم مكانوش بيقولوا حاجة غير إن دول أطفال يعملوا اللي يعملوه وكنت بحاول أبعد عنهم وأقعد بعيد عنهم”.
ووجهت آية رسالة للمتنمرين قائلة: “حابة أقول للمتنمرين إن انتوا فاهمين غلط إحنا ربنا شايفنا نقدر نستحمل حاجة محدش فيكم يقدر يستحملها ربنا اختارنا عشان شايفنا نقدر، كفاية إن ربنا شايفنا إننا قد حاجة زي كده”.
وأنهت آية حديثها قائلة: “حلم حياتي إني أجمع الناس اللي زيي وأحسسهم إن قد إيه هما حاجة كبيرة جدًا عند ربنا، ونفسي أحببهم في الموضوع زي ما أنا حباه”.
آية تتحدى التنمر بالمدرسة